Cəlil Hüseynov

Uzun illər neft sənayesində çalışmış, son 4–5 ildə isə yaşayış və fərdi evlərin elektrik sistemlərinin quraşdırılması sahəsində fəaliyyət göstərirəm.

Elektrik sisteminin təhlükəsiz və uzunömürlü olması ilk növbədə düzgün layihələndirmədən başlayır. Hər bir elektrik avadanlığı üçün onun gücünə və cərəyan yükünə uyğun kabel seçilməli, həmçinin uyğun nominala malik avtomat qoruyuculardan istifadə edilməlidir.

Əsas prinsiplərdən biri elektrik yüklərinin düzgün bölüşdürülməsidir. Su qızdırıcısı, kondisioner, elektrik sobası və yüksək güc tələb edən digər avadanlıqlar üçün mütləq ayrıca elektrik xətti çəkilməlidir.

Bundan əlavə, hər bir evdə etibarlı torpaqlama sistemi olmalı, bütün elektrik birləşmələri keyfiyyətli və möhkəm icra edilməlidir. Elektrik təhlükəsizliyinin təmin olunması üçün faza qoruyucusu, sızma cərəyanına (RCD) qarşı qoruyucu, gərginlik dəyişmələrindən və nəmişliyin yarada biləcəyi risklərdən qoruyan müasir mühafizə avtomatlarından istifadə edilməsi vacibdir.

Düzgün qurulmuş elektrik sistemi yalnız avadanlıqların etibarlı işləməsini deyil, həm də insanların həyat və əmlak təhlükəsizliyini təmin edir.